منتديات أبناء جبل موية


تقافية اجتماعية فنية
 
الرئيسيةالبوابةاليوميةمكتبة الصورس .و .جبحـثقائمة الاعضاءالمجموعاتالتسجيلدخول
منتديات ابناء جبل مويا ترحب بالزوار والأعضاء الجدد في رحابها متمنيين لهم قضاء أجمل واسعد الاوقات

      &&&&&&&         دعوة: لجميع الاهل بجبل مويا للانضمام لركب منتديات جبل مويا

تم إنشاء وافتتاح المنتدي في 1 اغسطس 2009
.هذا رقم الجمعية:(0917366766) بطرف إبراهيم الفاضل
منتديات ابناء جبل مويه تدين وتستنكر الهجوم علي منطقة هجليج الغنيه بالنفط وتعلن جاهزيتها خلف القوات المسلحه
تدعوكم رابطة ابناء جبل مويا بالجامعات والمعاهد العليا للانضمام لركبها
شاطر | 
 

 بعض من شعر الحماسة السوداني

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
محمد عثمان القاسمي
عضؤ مميز


عدد المساهمات: 18
تاريخ التسجيل: 09/07/2010
العمر: 36

مُساهمةموضوع: بعض من شعر الحماسة السوداني   الثلاثاء يوليو 20, 2010 12:13 am


االكل يعلم ما كان من دور قوى و متين للشعر الحماسى فى تحريك الهمم لدحر الغزاة الانجليز وغيرهم واليكم بعض منه وقد الف فى الفترة من 1821 الى 1924
أغاني الحماسة ... تلكم ألاغاني التي ما أن نسمعها ... حتى نحس بأننا قد ملكنا الأرض ..
وان أقدامنا تعلوا الثريا ....
كنت منذ أمد غير قريب أحاول أن اعرف سر ارتباطنا الوجداني بتلكم ألاغاني ...
وأثرها العظيم علينا ....
فمن زمن الحكامات ... ومرورا بأغاني الدلوكة ... وحتى الإيقاعات الحديثة ....
كانت دقة السيرة وما يصاحبها من كلمات تلهب نفوس الشباب والشيب معا ...
فمنهم من برز للبطان غير هياب ولا وجل ....
– البطان- هو الجلد بالسياط على إيقاع الدلوكة ...

ومنهم من خرج للعرضة والشبال ...
ومنهم من خرج لملاقاة عدو أكثر منه عدة وعتادا من جراء تلكم الحماسة ... بل وينتصر أيضا ....
مثلما فعل الشايقية مع المستعمر وكانت خلفهم مهيرة بت عبود تحسب بجيش وحدها ... هي وكلماتها ....!!

سنخوض معا الى اجمل ماكتب عن شعر الحماسه

فالى البست معا اخوتى

----------------------------------------------------------------------------
ماهو الفافنوس

دا إن اداك وكــــــــــتر ما بيقـول اديت
أب درق الموشح كلو بالـــــــــسوميت
أب رسوة البكر حجر شـــــراب سيتيت
كاتال في الخلا وعقبن كريم في البيت


ماهو الفافنوس ماهو الغليد القوص
ود المك عريس خيلا بيجن عركوس
احي على سيـــــــــفوا البحد الروس


ما دايرالك الميتة ام رمادا شح
دايراك يوم لقى بدميك تتوشــح
الميت مسلوب والعـجاج يكتــح
احي على سيفوا البسوى التح


إن وردن بجيــــــك في أول الوردات
مرنن مو نشـــــيط إن قبلن شاردات
أسد بيشة المكربت قمزاتو مطـبقات
وبرضع في ضرايع العونز الفاردات


كوفيتك الخودة ام عصــــــــــــا بولاد
درعك في ام لهيب زي الشمس وقاد
سيفك من سقايتو استعـــــجب الحداد
قارحك غير شكال ما بـــيقربو الشداد


يا بقت عقود السم يا جرعة عقود السم
يا مقنع بنـــــــــــــات جعل العزاز منجم
الخيل عركـــــــــــسن ماقال عدادن كم
فرتاك حافـــــــــــلن ملاي سروجن دم


وماهو الفافنوس ماهو الغليد القوص
ود المك عريس خيلا بـــجن عركوس
احي على سيفـــــــــــوا البحد الروس

--------------------------------------------------------------------------------

بتريد اللطام

بتريد اللطام أسد الكداد الزام
هزيت البلد من اليمن للشام
سيفك للفقر قلاّم

*****

ديّم فى التقر أنصارو منزربين
بالصفا واليقين حقيقة أنصار دين
بالحرب أم طبائق قابلو المرتيين
فى وش المكن رقدوا التقول نايمين

*****

ديّم فى التقر أنصارو زاربنو
بعهدوا القبيل بي عيسى تاهمنو
إتلموا العمد ليهم نقر سنو
الهوج والشرق طار المنام منو

*****

ديّم فى التقر قال العمير للسوم
القوي والضعيف من عينو طار النوم
الكفرة النجوس ما بختوا من اللوم
حجرت الدرب خليت جمالهم تحوم

*****

الأسد النتر وقال الدين منصور
لمولو الأورط جابوهم بالبابور
العمد الكبار كلامهم بقى مدحور
كم فقشت مدير وكرمت بالمأمور

*****

الأسد النتر بي جيهة الأبقار
لمولو الأورط شايلين سلاح النار
ود حبوبه قام ورتّب الأنصار
فى متفيه ديك كم شبعن صقّار

*****

الإعلان صدر واتلمت المخلوق
بي عيني بشوف أب رسوه طامح فوق
كان جات بالمراد واليمين مطلوق
ما كان بتشنق ود أب كريق فى السوق

*****

الإعلان صدر وإتلمت الحلال
نصبولوا السلاح وإتكرنف الخيال
قدر الله الحصل والزمن ميّال
منسول من أبوك ماك ودحرام دجّال

*****

بتكلم بقول بوريك شّن حسبو
نايبو السنين منّو الرجال حسبو
كل الخاصموك فى الآخره ما كسبو
التبعوك جنود لله ما انتسبو

*****

رضوان الإله تملأ الضريح كافور
مسك الرحمه لاح منو يلوح النور
أغفر سيئات كل من يجيك يزور
فى الفردوس هناك يتمنى مهما يدور

*****

------------------------------------------------------------------------------
السيل بوبا


غير خالد ماليك تنين عرش دود الأربعين
السيل بوبا يا الفوتك مو دحين
تغني ليك أم هاني
ويشهدو أهل المعاني
نضيفا خاتي ريحة الشاني
كتل ديلاك خبرو جاني
يا القمره الماك شهير
يا الرأسى الماك صغير
أبوك بساطى القبيل
تبراهو الشعبه والجنزير
خت كرسيه للعديل
وكورك قال يا غفير
سيفه بدلي الجفير
العاداك وين يطير
شقيا صادف نكير
شدلوا ليك في أم سبيب
كشفن ليك أمات وضيب
القاصدنو منك ما بخيب
والف الشمس قبال تغيب
تغنى ليك ظبية الحدر
ما بتبلع من اصلو مر
المكنه فوقو بتكاكى
والمدفع تحتو بيخر
لا بيخاف ولا بيتر
قدام العينهم خ

----------------------------------------------------------------
الواعي ما بوصو

من أمس الضحى
تورى أب زنود ساقو
يتور بقر الجواميس العليك الرك
يا عقد الحديد للحلبي ما بتنفك
تورك يا أم رشوم فى الحلق عشرق
دقيت الجسر وحاجر مشارع الحق
****
غنيت وجبت مسدار
المكنه بتكاكي وجنن مدافع النار
لفوك يا رحل الكحل دلوك ما بتندار
أمانه يا صقر ما تفرشت ليك برجال
****
غنيت وجبت نمك
بجر القول عليك يا مقنع الكاشافات
أسد الخلا الحجّر اليايات
ساقوك للشنق
يا أبو آمنه حوبتك جات
****
غنى وشكّرى يا خضرة الجّموح
طلع لي عشاري الليله مسكو يفوح
ما خطف البدينقه وما جفّل مجروح
سيفو بيأخد الخوذه ومعاها الروح
****
أمك ولدتك ما ولدتهم إتنين
تسلم يا تلبي البكيل العين
حالف يمين ما يكون بين البين
دقيت الجسر لى متعة الحيين
****



الليلة العقيد شوفنو متمسكـن
وفي قلب التراب شوفنو متجكن
الراي فارقو لا بشفي لا بمكن
ما تتعجبن ضيم الرجال يمكـن
خلوكن براكن الليلـة وحدكـن
بتمشن تحاربـن ولا بتتبكـن


الآلاف درجن

الآلاف درجن ولدا نجيض ماك ني
البجرجر فى أم صقير وحدي

*******

غنى وشكّري يا أختوا يا ريا
تمساح الكواني الضارب اللّيه
سمعنالنا خبرا فى الهلاليه
خمستاشر جواد سكّن سبعمائه

*******

من قومة الجهل ما خوفوك بي أخ
تور بقر الجواميس الرقادن لخ
نقرولو أم هبك الضربخانه يدخ
قرنك بفتح الهامه وبمرق المخ

*******

أنا قولي ليك صحيح
يا ركاب على شلق بنات الريح
يا جدري النزيله الدم كرف فى القيح
إدريس صاقعة التلوى المقابله تسيح

*******

ما بحركو الكشكيش
والقلب إن رجف ما بينفع الحريش
الجنيات وراك فى الحله آفة عيش
ود المقدره البيعزم على الما فيش

*****
خال فاطنه

سام الروح سبله ..... أنا أخوي جبل الضرا

*******

سيد أم رطين ماضلّ .... فارس الألف نقدالله
يسلم لي خال فاطنه .... بلالي البدّرج العاطله

*******

أب كريق فى اللجج .... سدّر حبس الفجج
عاشميق حبل الوجج .... أنا أبوي مقلام الحجج

*******

يا خريف الرتوع .... أب شقه قمر السبوع
فوح بيتو بسند الجوع .... يا قشّاش الدم

---------------------------------------------------------------------------
ويحكى أيضا انه لما زحف محمود ود كوينه بجيش ملك سنار بقصد الغارة على الملك إدريس ملك الجعليين وكان جند سنار يناهز الثمانية آلاف وليس لإدريس ما يعادل ربع هذا العدد من رجاله فداخله الخوف على قبيلته وعرضه وأراد هجر بلاده والاحتماء بالشايقية فجمع الحوايا أكداسا وجاء بالآلاف من جمال الحسانية فدخل عليه النعيسان وهو مغن مشهور وقال له ....

إدريس ابوى ماصع الضمر بالرق ..... إدريس مدفع الترك الذخيرته تبق
شمــر يا ولــــد لنحـــاسك دق ....... قدر الله بيطيح حتى إن بقيت في حق

بيطيح بمعنى يقع والحق عبارة عن عُلبَة فالمغنى يقول إضرب نحاسك وقابل العدو بدون اكتراث فالمقدور لك أو عليك واقع لا محالة حتى وإن كنت في حق أى محصنا في علبة مغلقة ....
ولم يتردد حينها الملك إدريس حيث أمر بحرق الحوايا ومعدات السفر وضرب نحاسه وانتظر جند الفونج إلى أن وصل المتمة وهناك حدثت بينهم حرب عظيمة قتل فيها محمود ود كوينه وهزم جيشه وانتصر الملك إدريس بعد يأس .( المصدر نفثات اليراع في الأدب والتاريخ والاجتماع للأستاذ محمد عبدالرحيم ).
وخير مثال للشعر التحريضي ما قالته امرأة شاعرة تحرض إبنها على القتال وتحثه على ترك الدروس وحفظ القرآن الكريم ليشارك قبيلته في حروبها وقتالها ويصبح بطلا من أبطالها ) ....

يا حسين أنا مانى أمك وانت ماك ولدى
بطنك كرّشت وغىّ البنات ناسي
دقنك حمّست جلدك خرش مو في
ولاك مضرّب بالسيف نكمّد في
متين يا حسين أشوف لوحك معلق
لا حسين كتل لا حسين مفلّق


وتعنى بهذه الأبيات لا هي أمه ولا هو ابنه لأنه صار بدينا له كرش منهمكا في الدروس ناسيا حب البنات الذي يدفع إلى الرجولة والشجاعة والإقدام ( والغي يقصد به الحب ) قال أبوصلاح في أغنية فريع البانه ....

نار قلبي بتوقد من وسمه تلمع في خديده وتفر بسمه
الفم الزى خاتم نص قسمه يالماك داريابى والغي قسمه

وانك أصبحت ناعما أملس الجلد ليس في جسمك آثار جروح وقد نبتت لحيتك وبلغت مبلغ الرجال ، فمتى اسمع بأنك قد ضربك سيف لأفخر في الحي بتضميد جروحك ومتى أرى لوحك الذي تدرس فيه مهجورا معلقا على الحائط ، ومتى أسمع أن حسينا قد قتل أو أن رأسه قد تشقق من الضرب.
( راجع الشعر السوداني في المعارك السياسية 1821 – 1924 تأليف محمد محمد على ).
الوقائع التاريخية التى ذكرتها سابقا توضح لنا أثر الشعر الحماسي في اتخاذ القرارات وتغيير موقف الحكام والقادة وخوضهم للحروب نتيجة لهذه الأشعار التي بثت فيهم روح القتال والتضحية والاستهانة بالموت .
.وهذه الأغانى ذات رسالة أخلاقية أيضا فهي تتحدث عن القيم الفاضلة وتمجدها وتحث عليها فمفرداتها تعبر عن الشهامة والرجولة والشجاعة والكرم ، كما أسلفت ، وهذه صفات متلازمة فالكريم شجاع لأنه قهر البخل في دواخله وهزم الأنانية، وتمجد هذه الاغانى أيضا الفروسية وتشيد بالانتصارات والبطولات وتنادي بها وتؤرخ لها ....كذلك تصور لنا بعض الأحداث التي أثارت الشاعرية في دواخل هؤلاء الشعراء ، وتحكى لنا هذه الاغانى أحداث المعارك وتوثقها بكلماتها المعبرة والصادقة . بعض هذه الأشعار والأغاني جيدة وقوية ورصينة ومعبرة ومتناسقة والبعض منها ليس بالشعر الجيد من ناحية المعنى والمضمون أو الموسيقى الشعرية سيما إذا كان من ذلك النوع الذي يثير النعرة القبلية والعرقية عند الناس ولكننا أحيانا نجد المبرر لأولئك الشعراء إذا حاكمنا شعرهم في إطاره الزمانى والمكاني ولم نفصله عن البيئة التي نشأ فيها والثقافة التي أوجدت هذا الشعر حيث كانت الحروب القبلية هي السائد وقتها .
هذه الأشعار والأغانى تاريخها قديم في السودان وتتوفر وتسود لدى كافة القبائل السودانية حتى تلك التي لا تتحدث اللغة العربية إذا فهي ثقافة منتشرة في كل أنحاء الوطن ومنذ قديم الزمان....

---------------------------------------------------------------------------
هذه القصيد كتبت في الحسن ودضبعة شيق عمدة الجوير عبدالله ودضبعة غرب شندي .. كان رجل قارح وفارس وشهم وكريم وفارس القرية .....

نص القصيدة

سيد محكر الديوان ثابت يا أب قلب
تقابة لي النيران وين متل الحسن

الحسن يا الحسن غنيتّا ليك بي قياس
صنديد لي الولايا ولي الدموع قشاش
يا مطر السواري الماك هبوب ورشاش
حنكو البليغ خلوهو يتحدث
سيد زيناً قبيل قبل الناس تعرف الناس
سيد أصلاً قديم من الحمزه والعباس

الحسن والحسن في عايلة ماتسمّا
ضباح الربايب سيد القدح لمّا
دالي وبرمكي وببرّد حشا العمّا
دا ولادة النجاح الما بتدرك البلما
شوف عيني التساب الفوق البلد عمّا
ود ضبعة التساب الفوق البلد عمّا

أناغنيت بولف ليك
ياالدابي العُشاري وزي الشرار عينيك
خبرك بندقية
تلب يا الصقر توّر الرخم مني

الحسن يا الحسن دوم بغني لِي
تمساح جلقني وزي الشرار عيني
ما شال بندقية وقال بتحميني
تلب يا الصقر تور الرخم مني

-------------------------------------------------------------------------------
رقية محمد إمام كتبت فى حداثة قتل ود حبوبة مستر س . سكوت منكريف والمأمور واليوزباشي محمد شريف وكان ذلك في 29/4/1908 ولقد جاء المفتش والمأمور وحراسهما إلى التقر بالجمال


العمير للسوم تيّم في التقر قال
القوى والضعيف من عينو طار النوم
بختوا من اللوم الكفرة النجوس ما
حجرت الدرب خليت جمالهم تحوم
*********
الأسد النتر وقال الدين منصور
لمولوا الاورط جابوهم بالبابور
العمد الكبار كلامهم بقى مدحور
كم فقشت مدير وكرمت بالمأمور
الأسد النتر بى جيهة الأبقار
لمولو الاورط شايلين سلاح النار
ود حبوبه قام ورتب الأنصار
في كتفيه ديك كم شبعن صقار

-------------------------------------------------------------------------------
لقد صورت لنا رقية آخت ود حبوبه مشهد محاكمة عبد القادر ود حبوبة والحكم عليه بالاعدام في الأبيات الآتية ...

الإعلان صدر واتلمت المخلوق
بى عينى بشوف أب رسوه طامح فوق
كان جات بالمراد واليمين مطلوق
ما كان بنشنق ود أب كريق في السوق
الإعلان صدر واتلمت الحلال
نصبولو السلاح واتكرنف الخيال
قدر الله الحصل و الزمان ميال
منسول من ابوك ماك ود حرام دجال

ولقد دفن جثمانه الطاهر بالقرب من قرية الحلاويين (مصطفى قرشي ) ، ولقد قالت رقية في ضريحه ...
.
رضوان الإله تملأ الضريح كافور
مسك الرحمه لاح منو يلوح النور
اغفر سيئات كل من يجيك زور
في الفردوس هناك يتمنى مهما يدور

------------------------------------------------------------------------------
الواعي ما بوصو
كلمات بت مسيمس
رواية الفنان / بادي محمد الطيب

الواعي ما بوصو
من أمس الضحى
تورى أب زنود ساقو
يا مقنع ولياتو
********
تور بقر الجواميس العليك الرك
يا عقد الحديد للحلبي ما بتنفك
تورك يا أم رشوم في الحلق عشرق
دقيت الجسر وحاجر مشارع الحق
*********
غنيت وجبت مسدار
المكنه بتكاكى وجنن مدافع النار
لفوك يا رحل الكحل دلوك ما بتندار
أمانة يا صقر ما تفرشت ليك برجال
********
غنيت وجبت نمك
بجر القول عليك يا مقنع الكاشفات
أسد الخلا الحجر اليويات
ساقوك لي الشنق
يا أبو أمنه حوبتك جات
*******
غنى وشكري يا خضرة الجٌم
طلع لي عشارى الليله مسكو يفوح
ما خطف البدينقه وما جفل مجروح
سيفو بياخد الخوده ومعاها الروح
********
أمك ولدتك ما ولدتم أتنين
تسلم لي يا تلبى البكيل العين
حالف يمين ما بكون بين البين
دقيت الجسر لي متعة الحيين
*********
غنيلو يا بنيه
من قومة الجهل ما قاملو بى نيه
وكت الشوف أشوف وقفولو سلطيه
تعدى وركز قال اخوكى يا رقيه

--------------------------------------------------------------------------
الآلاف درجن

كلمات / رقية بنت مسمار

الآلاف درجن ولدا نجيض ماك ني
البجرجر فى ام صقير وحدي
********
غنى وشكري يا اختو يا ريا
تمساح الكوانى الضارب الليه
سمعنالن خبرا في الهلالية
خمستاشر جواد سكن سبعمائة
*******
من قومة الجهل ما خوفوك باخ
تور بقر الجواميس الرقادن لخ
نقرولو أم هبك الضربخانه يدخ
قرنك بفتح الهامه وبمرق المخ
*******
أنا قولي ليك صحيح
ياركاب على شلق بنات الريح
ياجدرى النزيله الدم كرف في القيح
ادر صاقعة التلوي المقابله السيح
*******
ما بحركو الكشكيش
والقلب ان رجف ما بنفع الحريش
الجنيات براك في الحلة آفة عيش
ود المقدره البيعزم على المافيش

-----------------------------------
مشيتم حفايا


مشيتم حفايا وأديتم القارض
ورتعت المعاك فوق ضلك البارد
أب كريق حجر الوارد
*********
الليله أب كريق يبرا بالموجات
فوق ضهرو الخبوب ضنبو تسع طيات
كم دقيت مسامير التدر ملويات
بغروا من الترب أفضل وخيرا مات
**********
عجل الهوسكى الماك ولادة صيف
أرفق بالضعاف وديك شبعهم كتيف
من قومة الجهل بعرف قدلة السيف
دفاع للطرز البمشن الحنيف
********
النبوت عوى للبحمل الرسه
طارى حديث بنات جبهتن ملساء
بختف بسٌرع أسرع من الرمشه
الطاردك زلق ما بلحس الخمسه
*********
شيخ الخط محمد البردخ النقال
سمعوا جروا فزو بالحلال
بقيل أم عشوش زردوهم الحمار
قاموا متفجرين مبيتم السمار

---------------------------------------------------------------------------
سمحه الهيبة فوق مختار

عرش دود مراقد السار
لي المو فشار
خايلة الملكه فوق مختار
********
سيد الأبيض النهار
سيد المهره والقرقار
ايدك الما بتخون الجار
ايدك ترجم الحفار
لي المو فشار
*******
عرش زى أبوك يا دود
احسب لي تمانيه جدود
ات فوق الرجال بالعود
ضربك جله مو بارود
*********
قالت امو جيت لى
لي ناظر العبيديه
جدك يغفر السيئة
وخالف للرجال كيه
********
ما بيدى ويقول أديت
ما اتفشر وقال سويت
القنديل سراج البيت
حمد لله سلامتك جيت
********
العنتيل جاء يتقنت
من شوفتو الرجال جنت
عرش فوقن أتعنت
ولا تخيب رجاء الظنت
*******
ميرف ود ملوك بربر
خت الكرسي واتحكر
قال للمستر أتذكر
مك في دارنا ما بتظهر
**********
يا الماسك الدريب طلش
ديل ناس رحمه لا تنغش
ضربك جله مو بالرش
شن جاب الحديد للقش

-------------------------------------------------------------------------
ماهو الفافنوس
شعر / بنونه بت المك نمر

ما هو الفافنوس ماهو الغليد البوص
ود المك عريس خيلا بجن عركوس
احى على سيفه البحد الروس
********
ما دايرالك الميته أم رمادا شح
دايراك يوم لُقاء بدميك تتوشح
الميت مسولب والعجاج يكتح
احى على سيفه البسوى التاح
*******
إن وردن بجيك في أول الواردات
مرنا مو نشيط إن قبلن شاردات
أسد بيشه المكرمد قمزاته متطابقات
وبرضع في ضرايع العنز الفاردات
*********
كوفيتك الخوده أم عصا بولاد
ودرعك في أم لهيب زى الشمس وقاد
وسيفك من سقايتو استعجب الحداد
وقارحك غير شكال ما بقربه الشدّاد
*********
يا جرعة عقود السم
يا مقنع بنات جعل العزاز من جم
الخيل عركسن ما قال عدادن كم
فرتاق حافلن ملاى سروجن دم</b></i>

-----------------------------------------------------------------------
الوافر ضراعو



الوافر ضراعو أمنتو الرسول
مأمون الوداعه برد دار أبوه
********
غنى يا الهويده
لود البها وجريت القصيدة
شال الصوت عرض تاية أخوى فريدة
يا جنيات انصرفو ميزة أخوى بعيدة
*******
تغنى الفى جرفو
لود البها والخلوق بتعرفو
شال الصوت عرض يا جنيات انصرفو
نمر العبدلاب الما بيرجف كتفو
**********
غنى يا سلكوكه
جر النم عليه وخنقى الدلوكه
انت يا الأصم يا الما بحمسوكا
يا ضرب يومين تنزل فوق عدوكا
*******
تغنى الرحمه قالت
يا قشاش دموعي العلى سالت
وقت الحاره جات والفرسان ان جالت
نادولى الحسن تومى الحرابه دارت
*********
فهمك مو دراسه
يالنيل الطمح كسر التُّراسه
وقت الصيح وقع والفرسان تتواسى
برد دار ابوك تضرع ضحى وناسا
**********
فهمك مو قليل
يالهامه اب زنود فى السموم تقيل
يا رحل الكحل بالشضاض تميل
جيت يا خيرنا قش دمعى المسيل

--------------------------------------------------------------------------------

كسار قلم ماكميك

عليك بجر النم يا دقر الحرائق
أصبحت كاتم السم عشميق الأصم
********
شدولو ركب فوق اصهبا وحشي
رايو مكملو وكلامو ما هبشي
اديتكم أمانه متقنعه وتمشى
عاشقانى الامانه ضيف الهجعه يتعشى
ما بتطاقش الهسوق وما بطاقشو الهسوق ولدا قبيل منسي
علكيكا كبير ماكميك جنى هكسى
*********
الليله البلد اتباشرو ناسو
يا بحر المحيط مين عبرو وقاسو
بريطانيا والترك ما لينو ساسو
والعضم الكبير كسرو وشرب ساسو
********
شدولو ركب فوق اصهبا مو ربيك
والهوى والشرق شرفا بعاينن ليك
العاقر تقول بلدى وبسمي عليك
يا عيد الضحية البفتحولو البيت
رايو مكملو وكسار قلم ماكميك</b></i>

------------------------------------------------------------------------

كلمات زينب بت فايد قالتها في أخيها الحسن ود فايد... تغنى بها أولاد المأمون وبادي محمد الطيب

بدخل في المحاص أب جلة بتفور قاهر
صمد البجن طابور
**********
شدولو فوق تاتاى
مطلوق الجبين اللى عرضو مو نساى
عجل مشن اب قرون للساهله مو رعاى
لسع صغير وقتين يسوى كيفن الرأي
**********
أرباب الفراسه الوسمو فوق ناظرو
والعوقه أب صفوف انت بتجى بتناظرو
ود فايد حسن ما بتقدرو تناظرو
والخوف حين قسمو أخوى ما حاضرو
**********
يا شقاق عتامير الخلا والصو
يا أب قلبا شجيع صوانو واقف كو
أشعت في القتال ليهو العرض والهو
في كباد الرجال شبع صقور الجو
********
الليله العيال اتسامرو البارود
جاك يا من كان على صف الحرابه يقود
ود فايد حسن الفارس المأسود
كوفيتو أم عبل وسط المحاص بتخوض
**********
عاجبنى العيال الكلهم نجاح
جاك يا من كان يجيك فوق العبار مو شاح
ود فايد حسن الفارس اللفاح
أتبسم لقاهن بين الحجل والراح<

............................غنى وشكري يالصفره مستوره
فوق تلب الخلا الغابتو محجوره
يامرض القلب وما بتخاف روبه
نوسار للخصيم لمن يموت طوله
*********
غنى وشكرنو يالتلات أخوات
لا رجفت لحمتو ولا لسانو اللات
السيف في يمينو بقدل على الدرقات
الخزين أخوى ومقنع الكاشفات
*********
غنى وشكري يا خضرة الليمون
من قومة الجهل عرضى واخوى مصيون
يالقدح السبيل انت الجراب مجرور
يا ب سيفا بسل الخوده والصنقور
**********
الشدرة الضليله الما نقرها السوس
فوق رأسها النمر وفوق ضلها الجاموس
فوق رأسها النمر وفوق ضلها الجاموس
شن تمشى وتقول لامات قرين مرشوش
*******
ما دايراكم أنا تكيلو تدوني
وما دايراكم أنا تخدمو تعشوني
الليله القوم فى البلد قالو بيسوقونى
ما دايراكم أنا تدوني عيش في جراب
ما دايراكم أنا تكسوني لي قرقاب
دايراكم أنا وقت الشوف يشوف تهزو بى أم قلاب

------------------------------


بشكر تلبا قديم هو يا ليله
حكاية عامر ود بشير
عامر يا جبل الحديد
عامر يا حنك البليد
عامر انا جيت لى
حس السوط يسوى عى
البغدى الطير والحدى
عامر يا جبل الضرى
امرقوا يا الجارين وراه
وزحوا يا الجنيات وراه
دا السيفو الماكل السرى
عامر بين ما خفى
دا اللطمو بيدلى بيه
الرجوع الى أعلى الصفحة اذهب الى الأسفل
محمد عيسى شوين
مشرف المنتدي الثقافي


عدد المساهمات: 539
تاريخ التسجيل: 19/05/2010
العمر: 36
الموقع: دولة الجبل: مدينة أبوحواء

مُساهمةموضوع: رد: بعض من شعر الحماسة السوداني   الثلاثاء يوليو 20, 2010 8:08 am


تحياتي لك كثيرا يامحمد عثمان لقد أطينتا المفيد من الشعر السوداني الفريد

والكل عجبني ولاكن أخص الابيات الاتيه :- وبهديها لكل الاعضاء

ما بيدى ويقول أديت
ما اتفشر وقال سويت
القنديل سراج البيت
حمد لله سلامتك جيت

ولك التحية مرة أخرى وتقبل مروري

الرجوع الى أعلى الصفحة اذهب الى الأسفل
محمد عيسى شوين
مشرف المنتدي الثقافي


عدد المساهمات: 539
تاريخ التسجيل: 19/05/2010
العمر: 36
الموقع: دولة الجبل: مدينة أبوحواء

مُساهمةموضوع: رد: بعض من شعر الحماسة السوداني   الثلاثاء يوليو 20, 2010 11:23 am



معليش تقبلونا للرد مرتين بمساهمه جديدة من شعر عزة النفس وهي تقول :-


لا تأسفن على غدر الزمان لطالما
رقصت على جثث الأسود كلابا
*******
لا تحسبن برقصها تعلو على أسيادها
تبقى الأسود أسودا والكلاب كلابا
*******
تبقى الأسود مخيفة في أسرها
حتى وإن نبحت عليها كلاب
********
تموت الأسد في الغابات جوعا
ولحم الضأن تأكله الكــلاب
********
وعبد قد ينام على حريـــر
وذو نسب مفارشه التــراب .

وأتمنى لك المزيد من المساهمات الشريفه الطيبة وتقبل إضافتي.




الرجوع الى أعلى الصفحة اذهب الى الأسفل
محمد عثمان القاسمي
عضؤ مميز


عدد المساهمات: 18
تاريخ التسجيل: 09/07/2010
العمر: 36

مُساهمةموضوع: رد: بعض من شعر الحماسة السوداني   الإثنين يوليو 26, 2010 10:49 pm

أخونا ود شوين , أشكرك كثيرا , بعض الناس يحسبون الزمن ما زمن كلام زى ده , لكن تصدق أنو مع الزمن الجبان ده كلام زى ده بثبت الزول ولا الراى شنو ؟
الرجوع الى أعلى الصفحة اذهب الى الأسفل
محمد عيسى شوين
مشرف المنتدي الثقافي


عدد المساهمات: 539
تاريخ التسجيل: 19/05/2010
العمر: 36
الموقع: دولة الجبل: مدينة أبوحواء

مُساهمةموضوع: رد: بعض من شعر الحماسة السوداني   الثلاثاء يوليو 27, 2010 9:45 am



أخي محمد عثمان لك التحية هازول ها شعرك (الحماسي) في محلو تمام التمام

والله كان مافي البشكر ولا البنبز ولا البمدح ولا محفذ أبدا مافي حد بخش الحروبات

وإن لم يدافعو عن وطنهم وأموالهم لا تكون لهم مواقف رجالية أبدا

نجد أن القراءن الكريم لقد حفذ الذين يقاتلون ويقتلون في سبيل الله

بان لهم الجنة وهذاء فوزا عظيم جدا وكذلك شعر الحماسة يحفذنا بالصفات الجميلة كالشجاعة والرجولة والكرم

والسلام عليكم وتقبل مروري
الرجوع الى أعلى الصفحة اذهب الى الأسفل
محمد عثمان القاسمي
عضؤ مميز


عدد المساهمات: 18
تاريخ التسجيل: 09/07/2010
العمر: 36

مُساهمةموضوع: رد: بعض من شعر الحماسة السوداني   الثلاثاء أغسطس 17, 2010 8:35 pm

عفارم عليك اخونا ود شوين-رمضان مبارك وكل سنة طيب
الرجوع الى أعلى الصفحة اذهب الى الأسفل
 

بعض من شعر الحماسة السوداني

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات أبناء جبل موية  ::  :: -