عمروها بالاصوات

الاعزاء بالمنتدى .. اخوتى واخواتى .. تحياتى من القلب .. وبعد .. تشرفت بالمرور على تعليقاتكم على ما سبق واليكم بعض الحلول المجربة لمشاكل القرية...فمن المعلوم بداهة ما درجت عليه الاحزاب السياسية من شراء اصوات الناخبين ( من الرمدانين والارزقية طبعا .. وديل نحن ما منهم) .. فقد تم بناء العديد من القرى من الساس للراس فى فترات انتخابية سابقة وقد كان لجبل موية شرف النزاهة الكامل ابان تلك الحملات وما ذلك لاسباب تتعلق بتركيبتها الطاهرة فقط وانما لاسباب اخرى اولها عزوف السادة المرشحين عن تلك الاصوات التى تتهم بانصاريتها القحة وبالتالى هم يدرجونها فى عداد الاصوات التى ستذهب للسادة ال المهدى ولا يجب التعب من وراءها او العمل على استرضائها .. وفى ذات الوقت يعتبرنا السادة اولاد المهدى (...) من الرصيد الثابت فى كشوفاتهم .. ولكن .. لاننا عرفنا وجربنا والبجرب المجرب بندم .. نقولها بصوت واحد وواضح .. انو اصواتنا واصوات اهلنا فى جبل موية معروضة للبيع مقابل الخدمات والتنمية والشارى لو بقى الشيطان ما عندنا مانع .. مافيش مهدى .. مافيش وطنى .. مافيش اى حاجة نافعة فى الاحزاب دى .. البيع كاش .. توصل الكهرباء ... بمية صوت .. توصل الموية .. بى مية وخمسين.... وقسما عظما ... انا قادر ابيع بصمات المواطنين بتاعينا فى الريف الغربى بمقابل مليار... يعنى سعر هيثم طمبل واحد ... ولا شنو .. عموما التجارة شطارة .. انسونا من القيم والمبادى البتدفن الزول حى دى

لك التحيه ود الشاهد كلامك عين العقل عن الاحزاب
الانصار هم ضيعونا من زمان و لحدي الان هم ورانا
و السبب هم الكبار الاباء و الاجداد و لم يعرفوا بان
الصادق يلهث وراء السياسه اكثر من الدين

شكرا على المرور ... الاخ احمد النعمة... قلناها كثير لكن ...لقد اسمعت اذ ناديت حيا.......عموما الفكرة وعمادها هى توحيد صوت الناخبين بالقرية .... عرض الموضوع على كل المرشحين قبض الثمن معجلا قبل ان تمتد يد ناخب الى صندوق وشكككككككرررررا مكررا

ود الشاهد لك التحية اها ان شاء الله قبضتوا الثمن وطبعا كاش وعوود ما بتخارج معانا و نحن مفوضنكم تب وكلنا للمصلحة العامة اى حاجة مويةوتعليم و صحة و مشاريع تنمية لزيادة الدخل ودى مهمة جدا لاستقرار المواطن وتقبل مرورى وتحياتى عبرك للوالد محمد احمد بابكر(الشاهد) ان شاء الله يكون بخير وعافية

الاخ احمد لك مني كل الود كلامك في محلو وارمي قدام ونحن بخلفك بس نعمر بلدنا. وجبل مويا محتاجه لينا نحن كشباب ياريت مانبخل عليها وعلي الناس التعابه وهم اهلنا ونحن منهم وياريت يكون عنوانا (الجبل في حدقات العيون ) حتي نلحق بما سبقونا من الامم . وتقبل مروري

بضم صوتي للشباب وبقول ليكم لو أنا ما موجود لكم حق الوكالة الكاملة في صوتي الترشيحي بيعوه بالنيابة بس غلوه شوية........... ولك مروري أخ احمد

حضوركم اثلج صدورنا ولكم كلمتنا ............ على درب البيع سايرون .. ولا نامت اعين الكسلاء